Ég var að setja inn myndir frá síðustu helgi. Þarna eru myndir frá ferðalaginu vestur. Fyrsta stopp var í Borgarfirði en við fundum okkur laut og borðuðum nesti í stað þess að stoppa í þjóðvegasjoppu og borga morðfjár fyrir sveittan hamborgara.

Næsta stopp var í Hólmavík, þar sem við litum inn á kaffihús og skoðuðum svo galdrasafn.

Þvínæst var ferð haldið áfram á Súðavík. Það segir sig sjálft að stoppin voru mun fleiri enda var Inga María þreytt á að hanga í bíl. Ferðin gekk samt ágætlega og við vorum komin á leiðarenda um sjö (minnir mig)

Á laugardeginum gengum við um Súðavík og skoðuðum meðal annars gamla bæinn þar sem flóðið féll. Á einni mynd sjást grunnar húsa sem lentu í flóðinu. Við hlið þeirra standa svo hús sem alveg sluppu við flóðið.

Síðar á laugardeginu keyrðum við til Bolungarvíkur. Stoppið þar varð styttra en við gerðum ráð fyrir þar sem Kolla datt og lenti með höfuðið á grjóti. Við höfðum áhyggjur af henni enda höggið þungt og fórum með hana á spítalann á Ísafirði til að láta skoða hana. Hún fékk ekki heilahristing og er nú hin hressasta. Það versta við þetta held ég að hafi verið að þurfa að vekja hana á tveggja tíma fresti næstu nótt. Hún skyldi ekkert í þessum furðulegu foreldrum sínum sem leyfðu henni ekki að sofa.

Á sunnudegi fórum við á Suðureyri en þar var sumarhátíð í gangi. Stoppuðum þar í smá tíma og dunduðum okkur. Áróra hitti þar bekkjarsystir sína, Hólmfríði sem var þar með afa sínum og ömmu sem búa á Ísafirði.

Fórum einnig á Flateyri á sunnudeginum, skoðuðum varnargarðinn sem var byggður eftir snjóflóðið 1995. Á Flateyri sá maður enga grunna, en við reyndum að sjá út hvar húsin hefðu staðið.