Liverpool - Lazio

Er að hlusta á lýsinguna af leik Liverpool og Lazio í beinni á frá Liverpool vefnum. Það gekk ekkert að horfa á beinu útsendinguna en það gengur sæmilega að hlusta á lýsingu. Sambandið er þó frekar slakt á köflum.

Baddi maðurinn hennar Sirrý sagði mér á laugardaginn að síminn væri að taka í notkun tengingu til London á næstunni. Það mun væntanlega hafa áhrif á gæðin þegar maður tengist vefþjónum í Evrópu.

Síðustu ár hafa allar tengingar símans til Evrópu farið í gegnum Bandaríkin sem er náttúrulega frekar slappt. Þessi nýja tenging til London er ein forsenda þess að serverinn fyrir EVE verður hýstur þar en ekki í New York.

Annars skil ég ekki þetta web broadcast dæmi alveg. Hver einasti aðili sem ætlar að horfa eða hlusta á þessar útsendingar tengist server í Bretlandi. Þannig að ef 100 manns á skerinu hlusta á leikinn er útsendingin í raun send 100 sinnum yfir hafið. Þetta er náttúrulega fáránlegt.

Í rauninni ætti að vera löngu búið að setja upp net af proxy serverum fyrir svona strauma, þannig að fyrir hverja útsendingu sem verið er að senda í beinni væri bara sent einu sinni á milli landa. Íslendingar myndu allir fara á Liverpool síðuna og velja þar að hlusta á leikinn, playerinn myndi fatta hvar næsti proxy server væri, t.d. hjá símanum og myndi biðja þann þjón um strauminn. Ég hreinlega skil ekki af hverju það er ekki búið að útfæra þetta, því þetta er alls ekki flókið tæknilega séð.