stakt strá

Það er stundum dáldið undarlegt að vera trúlaus og efast um alla yfirnáttúru. Þetta er nefnilega afskaplega sjaldgæf lífsskoðun.

Fólk tekur því líka yfirleitt frekar illa þegar annað fólk lýsir yfir vantrú. Flestir tengjast trúarskoðunum sínum einhverjum undarlegum tilfinningaböndum. Þar sem þeir hafa ekki veraldlega rök fyrir skoðunum sínum koma þeir fram við þær eins og börnin sín. Maður tekur því illa þegar aðrir setja út á börnin manns, jafnvel þó gagnrýnin sé réttmæt.

...

Eitt algengasta vopn trúmanna gegn trúleysinu er afneitun á skoðun trúleysingjans. "Í rauninni ertu mesti trúmaðurinn hér inni" er setning sem ég hef heyrt oftar en einu sinni. Ég hef reynt að andmæla þessu en er hættur því í dag, það tekur því ekki þar sem fólk nennir ekki að hlusta á ræður um muninn á skoðun og trú. Það hefur engan áhuga á því að heyra að það er grundvallarmunur á því að treysta einhverju og að trúa á eitthvað.

Satt að segja hef ég merkilega fáa sem ég get rætt við um þessi mál. Ég hélt að SAMT væri vettvangur fyrir fólk eins og mig til að ræða saman en ég er eiginlega ekki þeirrar skoðunar lengur. Í fyrsta lagi hef ég ekki ennþá jafnað mig á rökræðunum um hugsanaflutning. Ég átti ekki von á að lenda í rifrildi um þetta á þessum vettvangi. En ég átti enn síður von á að lenda í rökræðum þar sem ég var sakaður um að vera lokaður, þröngsýnn og ekki nógu vel lesinn.

Vissulega var þetta bara einn maður sem var þessarar skoðunar, allir aðrir virtust vera sömu skoðunar og ég, en staðreyndin er bara sú að þessi ákveðni maður er eiginlega hálfgerður leiðtogi hópsins.

Á póstlista SAMT virðist svo meginþemað vera umburðarlyndi. Virðing fyrir öðrum skoðunum er lykilatriði málsins. Ég satt að segja er ekki að leita að vettvangi til að ræða um hversu jafngildar allar skoðanir eru. Ég var að leita að vettvangi þar sem ég gat fundið fólk sem sömu/svipaðar lífsskoðanir og ég. Lifsskoðanir sem eru sjaldgæfar í dag.

Nú síðast eru menn farnir að skrifa lærðar greinar um að trúleysi sé trú í póstlista samt Ég þarf ekki á þessu að halda.