Máttur reiðinnar

Af hverju hefur fólk fordóma gagnvart reiði. Samfélagið fyrirlítur reiði. Kristið kjaftæði gengur út á að reiði skuli hemja. Rétta hinn vangann, láta vaða yfir sig. Samt gengur stór hluti blessaðrar Biblíunnar út á að Gvuð lætur reiði sína bitna á mannskepnunni en það er önnur saga.

Í kvöld var ég að spila fótbolta með Henson á æfingu á tennisvellinum í laugardal. Ég var reiður, verð það mjög oft í boltanum. En máttur reiðinnar er mikill. Ég spila oftast mun betur reiður. Reiðin drífur mig áfram, ég gef mig allan í návígin. Fer óhræddur í tæklingar og finn ekki fyrir sársauka fyrr en löngu eftirá. Boltinn í kvöld var stórfínn, allir voru sammála um það. Enginn kvartaði undan því að ég hefði verið reiður! Það að spila fótbolta reiður gengur út á að láta ekki vaða yfir sig, vaða yfir aðra. Ég er ekki að tala um pirring, ég er að tala um almennilega reiði, öskur - hatur.

Þetta hefur alltaf verið svona, frá því ég var pjakkur hef ég spilað fótbolta reiður og haft gaman að. Ég öskra þegar ég spila fótbolta, læt eins og bölvaður vitleysingur, hleypi frummanninum út. Læt ekki siðvenjur og slíkt kjaftæði þvælast fyrir mér. Í fótbolta gilda ákveðnar reglur og meðan maður heldur sig innan þeirra marka er allt annað í lagi.

Undanfarið hafa ýmsir verið reiðir. Feministar, friðarsinnar, náttúruverndarsinnar og fleiri eru reiðir. Reiðir yfir því að ekki sé nógu mikið gert, reiðir yfir því að alltof mikið sé gert.

Munurinn á mér og þeim er að þau spila ekki betur þegar þau eru reið, þau virðast ekkert hafa gaman af því að spila reið. Þvert á móti, þau eru reið og þeim leiðist. Þau þurfa að spila meiri fótbolta - eða stunda meira kynlíf, reið.

Galdurinn við að spila fótbolta reiður er að hafa gaman að því og sleppa reiðinni þegar boltinn er búinn. Læra að biðjast afsökunar eftir leik ef maður hefur gengið of langt. Það gerist sjaldan hjá mér en hefur þó gerst.

Ég held að fólk þurfi stundum að leifa sér að vera almennilega reitt. Gleyma þessu þvaðri um að maður verði að hafa stjórn á skapi sínu. Maður getur nefnilega alveg verið reiður og haft stjórn á skapi sínu. Verið reiður en verið maður sjálfur. Í lífinu eins og í fótbolta er það þannig að ef maður er ekki stundum reiður vaða einhverjir aðrir yfir mann, stappa á manni og skilja mann eftir með skottið milli lappanna, barinn á báðum vöngum, veltandi því fyrir sér hvað maður geti eiginlega gert til að koma í veg fyrir þetta. Vælandi yfir því hvað það lífið er ósanngjarn leikur, það var rangt gefið.

Virðir reglurnar, spilið leikinn og notið skapið. Til þess hafið þið það.