Þrjár sortir af hummus

Ég og Inga María dunduðum okkur við að búa til hummus í dag, gerðum þrjár mismunandi tegundir sem allar lukkuðust vel. Inga María skemmti sér vel, var dáldið hrædd við matvinnsluvélina en fannst samt gaman að fá að ýta á takkann. Vélin er með öryggi, ekki er hægt að setja hana af stað nema lokið sé á sínum stað og tryggilega fest.

Það er afskaplega einfalt að búa til hummus en krefst smá undirbúnings. Kjúklingabaunir þarf að leggja í bleyti daginn áður og sjóða í klukkutíma. Þær eru tilbúnar þegar það er hægt að kremja þær milli tveggja putta!

Svo skellir maður kjúklingabaununum í matvinnsluvél, bætir hálfu búnti af steinselju og nokkrum hvílauksrifjum út í og maukar þetta saman. Bætum svo 2 matskeiðum af tahini, sítrónusafa, salti og ólífuolíu. Maukum þetta saman þar til þetta er orðið silkimjúkt. Bætum olíu, salti og jafnvel paprikukryddi út í eftir smekk.

Hægt er að nota annað en steinselju, t.d. notaði ég ferska basiliku í eina gerðina í dag og rauðan chili pipar í aðra.

Hummusin setur maður svo á brauð, helst snittubrauð og borðar með bestu lyst.

Fyrsta tegundin sem ég gerði í dag var úr uppskrift sem er dreift í Hagkaupsverslunum og kemur frá Grænum Kosti. Hún inniheldur kjúklingabaunir, tahini, hvítlauk, steinselju, appelsínusafa, sítrónusafa, sojasósu, salt og paprikukrydd en enga olíu.
Hinar tegundirar setti ég nú bara saman eftir tilfinningu, önnur var með baununum, tahini, helling af hvítlauk, slatta af ferskri basiliku, smá sítrónusafa, smá appelsínusafa, ólífu olíu, salti og paprikukryddi. Hin var eins nema í stað basiliku var rauður chili.