Nágrannar Kínverska sendiráðsins mótmæla þessa dagana enda hafa Kommúnistarnir byggt tennisvöll í garðinum hjá sér.
Ekki ætla ég að agnúast út í það að nágrannar kvarti, nágrannar hafa rétt til þess og líklega hafa þeir eitthvað til síns máls í þessu tilviki.

En í frétt moggans hnaut ég um eina setningu: "Allar sérreglur vantar í lög og reglugerðir um tennisvelli í íbúðarhverfum. Það skyldi engan undra því slík notkun einkalóða er í sjálfu sér fráleit."

Og ég spyr, af hverju er slík notkun fráleit? Ég sé ekkert að því í sjálfu sér að fólk byggi tennisvöll á einkalóð ef hægt er að koma því þannig fyrir að nágrannar verði ekki fyrir verulegu ónæði.

Í fréttinni kemur einnig fram að mikil hætta getur verið af tennisboltum

Raunveruleg slysahætta sé af vellinum þar sem tennisboltar séu mjög harðir viðkomu og nái allt að 200 km hraða hjá bestu tennisleikurum. M.a. af þessari ástæðu sé 5-10 metra hátt net umhverfis tennisvelli í þéttbýli erlendis.

Ég myndi hafa meiri áhyggjur ef Kínverjarnir fengju golfdellu og færu að slá golfbolta í garðinum, ég braut t.d. rúðu í garði nágranna ömmu og afa á Stekkjaflöt þegar ég var unglingur.