Inga María er veik, var með tæplega fjörtíu stiga hita á tímabili í dag, mun minni hita í kvöld.

Þetta er einstaklega óheppileg tímasetning fyrir okkur, síðustu þrjá mánuði hef ég verið heima og veikindi barna voru ekkert vandamál. Núna er þetta bölvað vesen. Ég get ekki tekið mér veikindafrí fyrstu dagana þannig að þetta lendir á Gyðu.
Diddi bróðir ætlar að passa fyrir okkur í fyrramálið, hann á að mæta í vinnu á hádegi, Gyða fer í vinnuna fyrir hádegi.

Þegar ég var að fara að svæfa Ingu Maríu í kvöld lagðist ég á bakið og lét hana liggja ofan á mér, hún steinsofnaði meðan ég strauk á henni ennið.

Mér finnst afskaplega óþægilegt þegar börnin mín eru veik, maður kippir sér ekki upp við smá pestir og hita, en þegar hitinn og slappleikinn er mikill fer ég alltaf að ímynda mér að þetta sé verra en það er.