Páskamaturinn

Við vorum með matarboð í gær og elduðum kalkúna. Guðrún (tengdó) sá um forréttinn, Jóna Dóra kom með Waldorf salat og Þórður sá um desertinn ásamt því að aðstoða í eldhúsinu undir lokin.

Hér á eftir fer lýsing á Páskamáltíðinni 2004.

Í forrétt kom Guðrún með hrátt hangikjöt með ólívuolíu, kapers, káli og melónum. Afskaplega bragðgóður og skemmtilegur réttur, kjötið og melónurnar passa sérlega vel saman. Guðrún kom með flösku af Cepparello sem við bárum fram með forréttinum, skemmtilegt og bragðmikið Ítalskt rauðvín. Að sjálfsögðu kom Guðrún með alltof mikið af forrétt þannig við eigum helling eftir til að gæða okkur á, kvörtum ekki undan því :-)

Í Aðalrétt var kalkúni og fullt af meðlæti, alltof mikið meðlæti ef ég á að segja alveg eins og er. Kalkúninn var fylltur með aprikósufyllingu, en uppskriftina að henni fengum við úr veislubók Hagkaupa. Með fuglinum bárum við fram, brúnaðar kartöflur, Waldorf salatið hennar Jónu Dóru, ferskt salat, hvítkál steikt með engifer og hvítlauk (fersk rauðkál var ófáanlegt), kartöflumús úr sætum kartöflum með sveppum, rauðkál, gular baunir og venjulegar kartöflur fyrir Ingu Maríu og Stefán. Þetta heppnaðist afskaplega vel, fyllingin var mjög góð og kartöflumúsin vakti lukku, en þetta er í fyrsta sinn sem ég nota sætar kartöflur, ljóst að þær verða oftar á borðum í framtíðinni. Sósan var gerð úr soðinu af fuglinum og appelsínuþykkni. Þórður sá um gera sósuna, enda lætur maður kokkanemann um allt slíkt þegar hann er á staðnum, sósan heppnaðist líka mjög vel. Með aðalréttinum drukkum við Saint-emilion, létt rauðvín og gott en féll þó í skuggann af rauðvíninu sem var borið fram með forréttinum.

Þórður bakaði glæsilega súkkulaðiköku í desert, kom með vanilluís frá Perlunni og rosalega falleg jarðaber . Kakan var mjög góð og ísinn syndsamlegur. Vorum líka með helling af litlum páskaeggjum, en við áttum tíu stykki fyrir - Jóna Dóra kom með tíu og Gunna kom líka með slatta.

Í dag eru svo afgangar í matinn, því miður kláraðist fyllingin í gær en það er til slatti af öllu hinu.