Lucca

Fórum á fætur um hálf níu, borðuðum morgunmat og skelltum okkur til Lucca um ellefu. Miðborg Lucca er afskaplega skemmtilegur gamall virkisbær. Röltum um Lucca í þrjá tíma, stoppuðum og fengum okkur að borða í hádeginu. Það var að sjálfsögðu ansi hlýtt og hitamælir á vegg rétt við veitingastaðinn nálgaðist fjörtíu gráðu markið.

Sumir voru þreyttari en aðrir og Ásmundur lagði sig stundarkorn við borðið enda lítið sofinn eftir nóttina. Áróra Ósk svaf í þeirra herbergi og var víst til vandræða þessa nótt, vaknaði og átti erfitt með að sofna aftur. Staðurinn var ágætur þó fordrykkur sumra hafi valdið vonbrigðum og maturinn hennar Gyðu hafi gleymst!

Eftir mat héldum við áfram að rölta, skoðuðum byggingar og torg, þar með talið frægt aðaltorg bæjarins sem olli samt ákveðnum vonbrigðum. Röltum að lokum til baka á virkisveggnum sem er magnað mannvirki.

Heimleiðin gekk ekkert sérlega vel, reyndar ókum við beina og greiða leið til Massarossa en Áróra Ósk var ósköp slöpp og kvartaði mikið. Það má gera ráð fyrir bílveiki í svona ökuferðum.

Flestir skelltu sér í laugina þegar við komum til baka, ég og Gyða slepptum því og Gunna lagði sig. Inga María fór reyndar ekki í laugina, lék sér í uppblásnu lauginni í garðinum hjá okkur.

Elduðum hitt og þetta í kvöldmatinn, pizzur, ravioli og ýmislegt fleira. Ég skokkaði ekkert í kvöld, kannski á morgun. Við strákarnir ætluðum að horfa á landsleik Portúgala og Hollendinga á EM en komumst að því að leikurinn er alls ekkert í kvöld heldur annað kvöld.

Það gekk ekki vel að svæfa Kollu sem var afskaplega hátt uppi þessa dagana, en það tókst að lokum. Um kvöldið spiluðum við hin Liverpool spilið. Hitinn var kæfandi, Guðrún reyndi að opna einhverja glugga en aðrir voru hrædd við að hleypa flugunum inn. Liverpool spilið gekk ágætlega, Áróru greyinu gekk reyndar ekkert alltof vel. Spiluðum fram yfir miðnætti.

Myndir