Henson - Elliði

Henson 1 - 3 Elliði.

Leikurinn fór fram klukkan níu í kvöld á Ásvöllum í Hafnafirði, fínar aðstæður, gott veður og völlurinn rakur.

Leikurinn var jafn og ágætlega spilaður, Henson sótti meira til að byrja með en Elliði skoraði úr sinni fyrstu sókn með þrumuskoti af tuttugu metrum, óverjandi skot efst í markhornið en sóknarmaður Elliða fékk óþarflega mikinn tíma til að athafna sig.

Henson jafnaði þegar um tíu mínútur voru eftir af hálfleiknum, Maggi skoraði með góðu skoti eftir ágætan samleik við Óla.

Seinni hálfleikur hófst með látum og við sóttum nokkuð án þess að skapa mjög góð færi.

Elliði skoraði svo eitthvað drullumark sem ég man lítið eftir ! Við sóttum meira eftir þetta og ég átti meðal annars mjög gott færi eftir að Axel lék upp að endalínu og lagði boltan út, skotið hjá mér var ekki fast en stefndi alveg út að stönginni fjær, góður markvörður Elliða skutlaði sér og náði að teigja sig í boltann, ég hélt þetta væri pottþétt mark þegar ég horfði á eftir boltanum.

Elliði skoraði svo þriðja markið eftir að hafa fengið aukaspyrnu rétt fyrir utan teig, Birgir tæklaði sóknarmann vel en dómarinn dæmi, ranglega að mínu mati, aukaspyrnu. Elliðamenn renndu boltanum til hliðar og áttu þrumuskot að marki sem Hörður varði en sóknaðurmaður þeirra náði frákastinu og lagði boltann í markið úr þröngu færi.

Við sóttum meira það sem eftir var leiks, Alli átti fína spretti og var næstum búinn að skora en góður markvörður þeirra varði vel.

Dómari leiksins var ágætur, leyfði þó frekar mikið og sleppti oft augljósum brotum, þar með talið að minnsta kosti tvisvar þegar ég braut af mér, var eiginlega hættur útaf því að brotið var svo augljóst en hélt svo áfram þegar ekkert flaut heyrðist. Hann gaf okkur þó nokkur spjöld og þótti mér ansi mikið halla á liðin að því leyti, Elliðamenn fengu ekki eitt einasta spjald í leiknum þrátt fyrir að eiga að minnsta kosti fimm rennitæklingar sem flautað var á fyrstu tuttugu mínútur leikins.

Leikurinn fór þokkalega drengilega fram, lítið var um tuð eða leiðindi. Nokkuð var um brot en menn voru að spila þetta heiðarlega . Elliði er með gott lið, spiluðu vel sín á milli, sérstaklega úr vörninni og boltinn gekk hratt á milli manna.

Við hefðu vel getað fengið eitthvað út úr þessum leik, eins og svo oft í sumar. En það þýðir ekkert að væla um það, við vorum síst lakara liðið stóran hluta leiks en við verðum að nýta færin og megum ekki gefa á okkur færi.

Breyttum dálítið leikskipulagi í dag, Axel kom inn á miðjuna og Aggi spilaði frammi stóran hluta seinni hálfleiks. Ég held að þetta virki betur svona og mér þótti sóknarleikur liðsins öflugur í upphafi seinni hálfleiks, við sóttum þá á fleiri mönnum og gerðum ágætis hluti. Við munum stilla upp svipað í næsta leik.

Ég spilaði frammi stóran hluta leiksins, reyndi samt að skipta mér dálítið útaf vegna þess að mér finnst vanta alla ákveðni á hliðarlínuna. Það verður einfaldlega að kalla á menn og skipta þeim útaf, menn eru ekki að skipta sér útaf sjálfir þó þeir séu augljóslega alveg búnir á því og hættir að hlaupa aftur. Ég átti sæmilegan dag, sérstaklega þegar ég slakaði á og hélt boltanum í stað þessa að reyna erfiðar sendingar í fyrstu snertingu, hefði mátt gera betur í færinu sem ég fékk. Fæturnir héldu út leikinn, fann örlítið fyrir kálfanum en ekkert til að stressa sig útaf.

Jæja, tveir leikir eftir, næstum engin von um að forðast fall. Næstum engin.