Þessi morgun gekk ekki nægilega vel. Í fyrsta lagi sváfum við öll frekar lengi. Ég snúsaði til hálf níu, fór þá loks á fætur og sótti Kollu sem steinsvaf, fór með hana í rúmið mitt og þar kúrðum við áfram þrjú, ég, Kolla og Inga María. Kolla gafst svo upp á letinni og fór fram og klæddi sig. Vorum öll komin á fætur tíu mínútum fyrir níu.

Við vorum því frekar seint á ferðinni, sem er slæmt því á mánudögum er hópastarf hjá Kollu. Fengum okkur morgunmat og drifum okkur af stað.

Ósættið kom þegar Inga María var að klæða sig í skóna, hún ætlaði sér að klæða sig sjálf en gerði svo ekki neitt! Að lokum tók ég af henni skóna og klæddi hana, henni til mikillar armæðu. Ég þurfti að halda á henni organdi út í bíl og hún vældi alla leiðina í leikskólann.

Þegar þangað var komið fór Kolla inn á sína deild en ég settist niður með Ingu Maríu og reyndi að ná sáttum. Knúsaði hana og róaði, held hún hafi fyrirgefið mér. Kolla kom þá röltandi, hópastarf féll niður í dag vegna veikinda fóstrunnar sem sér um það. Vesenið, stressið og leiðindin að ástæðulausu :-|