Hvar er South Park?

Þar sem ég sagði upp Stöð2 (og Sýn) um daginn skipti ég nú ótt og títt milli RÚV, Skjás 1 og Sirkus. Oft er eitthvað áhugavert á einni stöðinni en jafn oft ekkert á neinni. Stundum staldrar maður við endursýningar á Seinfeld, Friends eða Everybody loves Raymond, en það er frekar útaf sjónvarpsfíkn heldur en gæðum þessara þátta, maður hefur séð þetta allt áður. Bráðlega fer vetrardagskráin í gang og eflaust verður þá eitthvað betra í boði.

Ég furða mig stundum á því hvað það er verið að sýna slaka þætti í íslensku sjónvarpi, eitthvað drasl sem hefur floppað í Bandaríkjunum er sýnt hér á besta tíma, væntanlega vegna þess að það hefur kostað lítið. Á sama tíma er ekki verið að sýna fullt af áhugaverðu sjónvarpsefni.

Hvar er t.d. South Park? Hvernig stendur á því að South Park þættirnir eru ekki sýndir hér á landi. Þetta er eitthvað magnaðasta sjónvarpsefni sem til er, hrár húmor í bland við pólitíska og siðferðilega umræðu, ekkert er heilagt. þessir þættir voru á Sýn fyrir einhverjum árum, eins furðulegt og það er, Sýn hefur verið fyrst og fremst verið sportstöð í fjölda ára, en nú eru þeir ekki í boði. Ég er sannfærður um að fullt af fólki hefur áhuga á að sjá South Park. það er, að mínu hógværa mati, glórulaust að bjóða ekki upp á þetta efni.

Aðrir þættir sem þessar stöðvar ættu að skoða eru Bullshitt þættir Penn og Teller, þrælmagnaðir þættir þar sem hulunni er svipt ofan af allskonar kjaftæði, Mythbusters sem eru á Discovery, fræðsluþættir eins og Scientific American Frontiers (sem ég hef áður minnst á og vafalítið fleiri sem ég þekki ekki.

Það er svo mikið til af frábæru sjónvarpsefni sem ekki er í boði hér á landi á meðan nóg er sýnt af rusli.

Hvar er South Park? Hvernig væri að skella þeim í loftið og sýna jafnvel frá byrjun á þokkalegum tíma. Ef það fær ekki áhorf skal ég hundur heita.