Uppáhalds skáldsögur
það er aldrei mikið að marka svona lista, maður telur upp það sem maður man og málið með mig er að ég man ekki neitt :-) Tók samt saman nokkrar bækur sem eru góðar í minningunni.
Á listanum eru einungis erlendar skáldsögur, flestar í íslenskri þýðingu, sem er dálítið skrítið, en þetta er bara þær bækur sem ég mundi eftir í fljótu bragði. Varla hægt að segja að þetta sé mjög "menningarlegur" listi, en svona er ég bara. Þetta er ekki topp tíu listi (enda bara níu bækur upptaldar), en þó er uppáhaldsbókin mín neðst.
- The Bug
Þessi hitti í mark. þetta er ekki besta skáldsaga í heimi, langt því frá. En sögupersónan gengur í gegnum hluti sem ég þekki alltof vel. Þeir sem hafa eytt andvökunóttum í að leita að óskiljanlegri forritunarvillu undir mikilli pressu mega ekki sleppa því að lesa þessa bók. Þessi bók er eiginlega bara fyrir forritara :-) - Cryptonomicon
Ég keypti þessa bók þegar ég fór til London árið 2000, las hana svo ekki fyrr en þremur árum síðar en las hana þá í einum rikk í sumarfríinu. Eignaðist Quicksilver eftir sama höfund, las hálfa bókina á Ítalíu í fyrra, ætli ég klári hana ekki næsta sumar! - Hverjum klukkan glymur, Hemingway
Veit ekki hvort það er bara ljóðið, en a.m.k. er bókin eftirminnileg. - Hundrað ára einsemd
Nýbúinn að lesa þessa og fannst hún góð. - Skræpótti fuglinn - Jerzy N. Kosinski
Hrakningar drengs í seinni heimsstyrjöldinni. Atriðið þar sem fuglinum er sleppt og titill bókarinnar kemur í ljós er minnisstætt. Líka kaflinn sem Siggi Run sendi inn í smásagnakeppnina í Flensborg (og vann) - Dýrabær, Orwell
Pólitíkin afgreidd úti í hlöðu - Ilmurinn, Patrick Süskind
Var þessi ekki auglýst sem fagurbókmenntir fyrir almenning? Hvað um það, ein besta "lokasena" bókar sem ég man eftir. - 1984, Orwell
Verða ekki allir sem hafa lesið þessa bók að hafa hana á sínum lista? - Birtingur, Voltaire
Uppáhalds bókin mín. Las hana sem unglingur, lánaði hana svo og hef aldrei fengið aftur, þarf að fara að kaupa mér nýtt eintak. Voltaire gerir grín að Leibnitz, Spinoza og í raun flestu því sem hægt er að draga dár að. Birtingur og Altúnga þvælast um heiminn og lenda í ótal hörmungum en missa ekki móðinn, sama hvað á gengur. Laxness þýddi bókina og gerði það helvíti skemmtilega.
Kannski ætti ég ekkert að reyna að eignast þessa bók aftur, hver veit nema hún standi ekki undir minningunni :-)
Annars stefni ég á að úrelda þennan lista. Ætla að lesa fleiri skáldsögur á næstunni. Er að lesa eina óskaplega vinsæla um þessar mundir en hún er ekkert að heilla mig, meira um það á næstu dögum.