Elduðum túnfiskpasta í kvöld, gerum það nokkuð reglulega. Gyða hringdi í mig meðan ég beið eftir strætó og fékk ráðleggingar. Þegar ég kom heim var búið að skera lauk og hvítlauk, allar dósir komnar á borð og spagettí byrjað að sjóða.

Hvernig eldar maður handa fimm fyrir um hundrað og fimmtíu krónur. Maður byrjar í Bónus, ég hamstraði spagettí og tómata í dós í gær þegar ég sá hvað það var ódýrt.

• spagettí 500gr 18kr
• Hunts tómatar í dós, skornir 400gr 34kr
• tómatpúrra 70gr 14kr
• hálf askja af sveppum 30kr
• 1 dós af túnfisk í vatni ~50kr (hef ekki hugmynd, keypti þetta ekki í gær - á alltaf til nokkrar dósir)
• laukur 3kr
• tvö hvítlauksrif 5kr (hef ekki hugmynd hvað þetta kostar)
• hálf tsk sykur
• hálf tsk sítrónusafi
• hálf tsk balsamik edik
• ólívu olía

Byrja á því að steikja lauk og hvítlauk í olíunni, bæta sveppunum útí þegar laukur er orðinn glær. Þegar sveppir eru tilbúnir skellum við tómötum og tómatpúrru út í, látum malla í smá stund. Bætum svo sykrinum, sítrónusafanum og balsamik edik út í. Leifum þessu að krauma í smá stund, hrærum vel í.

Þegar spagettíið er tilbúið (alls ekki ofsoðið, dragið mínútu frá suðutíma sem gefinn er upp á umbúðum!) skellum við því skál, smá olíu yfir. Slökkvum undir sósunni, tökum helminginn af túnfisknum og myljum milli fingra í sósuna, það má ekki setja of mikinn túnfisk, þá verður hann of ráðandi. Skellið restinni af túnfisknum á disk og leyfið krökkunum að borða hann. Túnfiskurinn á ekki að malla í sósunni, heldur skellum við þessu saman við pastað.

Borið fram með parmesan osti, maldon salti og svörtum pipar. Yfirleitt hef ég ekki sveppi með en við áttum til opna öskju og því fínt að nota þá. Ég er nýbyrjaður að nota sítrónusafa og balsamik edik, það má sleppa því en mér finnst það betra. Sykurinn tek ég alltaf milli tveggja putta og balsamic edikið dassa ég út í.

Þetta dugði vel handa okkur fimm, stelpurnar borða kannski ekki mjög mikið, en á móti kemur að ég borða stundum fullmikið eins og t.d. í þetta skiptið.