Ég er ekki alveg að fatta innlegg Össurar í umræðuna um birtingu tölvupósts í fjölmiðlum. Hann er semsagt að benda á að Morgunblaðið hafi ekki efni á að gagnrýna Fréttablaðið fyrir birtingu tölvupósts Jónínu Ben, sem virðist stolinn, því Mogginn hafi áður meðal annars birt tölvupóst Össurar. Hann segir:

Það er einsog hann hafi líka gleymt að Morgunblaðið sjálft setti fyrsta fordæmið varðandi birtingu stórblaðs á einkapósti úr tölvu vitandi vits um að það var bæði í óþökk sendanda og viðtakenda.

Er ekki sá eðlismunur á þessum málum að bréfið sem Morgunblaðið birtir kemur frá móttakenda tölvupóstsins. Viðtakandi bréfsins ræddi efni þess í fjölmiðlum og kom bréfinu í hendur þeirra. Er það satt að þetta hafi verið birt í óþökk viðtakanda eða er Össur ekki að ræða um tölvupóstinn sem hann sendi forsvarsmönnum Baugs um miðja nótt?

Ég get ekki séð að það sé margt sameiginlegt með þessum málum, því ljóst virðist að tölvupóstar þeir sem Fréttablaðið hefur verið að birta eru "þjófstolnir", þ.e.a.s. hvorki sendandi né móttakandi póstsins kom honum til Fréttablaðsins.

Ég myndi telja mig hafa rétt til þess að gera nokkurn vegin hvað sem er við þann tölvupóst sem mér berst, nema náttúrulega pósturinn berist mér fyrir mistök. Samkvæmt lögum mætti ég þá ekki nýta hann.

Nákvæmlega sama gildir um póst sem sendur var á alla alþingismenn og birtist í Morgunblaðinu, það má ljóst vera að einhver móttakandi póstsins kom honum til Morgunblaðsins.

Ég skil því ekki alveg þetta innlegg Össurar.