Í tilefni dagsins fór fjölskyldan út að borða í gærkvöldi. Skelltum okkur í Perluna sem býður upp á villibráðarhlaðborð um þessar mundir..

Fjölskyldan mætti á staðinn rétt fyrir sjö. Stelpurnar voru búnar að fá fyrirlestur um hegðun á fínum veitingastöðum, hafa svosem heyrt hann áður og þykjast kunna þetta allt saman. Yfirleitt kemur annað á daginn :-)

Mér sýnist matseðillinn á netinu ekki vera alveg nákvæmur, eflaust rótera þeir þessu eitthvað. Maturinn var mjög fínn og allir gátu fundið eitthvað við sitt hæfi (stelpurnar fundu náttúrulega líka helling sem þeim fannst ekki spennandi en pabbi þeirra reddaði því).

Forréttir voru fjölbreyttir, tvennskonar carpaccio stóð upp úr þar ásamt ágætri kæfu. Tvennt stóð upp úr á aðalréttaborði að mínu mati, villisveppir í smjördeigsformi og hreindýrakjötið. Sé eftir að hafa ekki fengið mér meira af hreindýrinu og sleppt desertunum í staðin, er ekkert sérstaklega mikið fyrir deserta.

Þjónustan var til fyrirmyndar en þeir hefðu samt mátt slaka aðeins á í að fjarlægja diska með hnífapörum. Þegar maður fer á hlaðborð vill maður stundum fara eina ferð í viðbót en þjónn setur á mann óþarfa pressu með svona dugnaði :-)

Reikningurinn var eins og gengur og gerist á íslenskum veitingastöðum. Rétt rúmar átján þúsund krónur með hálfri rauðvínsflösku (1750.-) og þremur gosglösum (750.-), við borguðum ekkert fyrir Kollu og Ingu Maríu en fullt verð fyrir Áróru. Þess má geta að þetta er töluvert hærri upphæð en við hjónin eyddum í mat og drykk í Krakáferðinni (fimm sinnum út að borða með bjór og léttvíni). Það segir reyndar meira um verðlagið í Póllandi en hér á landi.