Það voru tvær keppnir í gangi í síðustu viku, annars vegar beint niður og hins vegar mynd mótsins. Ég var í áttunda sæti í fyrri keppninni en þrítugasta og sjötta í hinni.

Átti svosem ekki von á neinu í þetta skipti en þrítugasta og sjötta sæti af fimmtíu og þremur er verri útkoma en ég bjóst við. Finnst dálítið merkilegt að sumir voru viðkvæmir fyrir greftrunarmyndinni. Fékk fjóra ása við þá mynd og svona athugasemdir:

"ósmekkleg mynd soory"
"Hvað í ósköpunum varstu að gera með myndavél í jarðaför ? "

Svarið er frekar einfalt. Þessi atburður skifti mig máli, ég fór dagsferð til Siglufjarðar til að vera viðstaddur greftrun ömmu og fannst við hæfi að festa atvikið á mynd. Ég get skilið að fólk sé ekki vant þessu og finnist þetta skrítið, jafnvel óviðeigandi en að segja að þetta sé "ósmekklegt" finnst mér smásálarháttur. Ég er viss um að ég á eftir að skoða þessar myndir í framtíðinni.

Ég var sammála niðurstöðum beggja keppna að því leyti að ég gaf báðum sigurmyndum hæstu einkunn. Aftur á móti gaf ég myndunum sem enduðu í þriðja sæti afar lága einkunn. Fannst ekkert í þær varið.

Ég nennti ekki að taka þátt í keppni vikunnar.