Ég hjó eftir einu þegar ég las frétt í gær um dóm yfir manni sem hafði barnaklám undir höndum. Í fréttinni segir m.a.

Á hörðum diskum í tölvu mannsins fundust 349 ljósmyndir og 17 stuttar hreyfimyndir sem sýndu börn á kynferðislegan eða klámfenginn hátt. Maðurinn fór með tölvuna í viðgerð og fundust myndirnar við skoðun lögreglu á tölvunni eftir að hald var lagt á hana.

Ég ætla ekki að velta mér upp úr dómnum yfir manninum heldur finnst mér áhugavert að íhuga hvernig upp komst um glæpinn.

Fólk fer með tölvur í viðgerð útaf ýmsum ástæðun, en ég get ekki látið mér detta neina bilun í hug sem veldur því að viðgerðarmaður hefur ástæðu til að flakka um harða diska vélarinnar. Við hreinsanir á vírusum og öðrum álíka óþverra eru keyrð forrit sem skanna vélina sjálfkrafa. Ef bilun er á disk er keyrt forrit sem finnur biluð svæði á disknum og merkir þau. Ef diskur er ónýtur er hugsanlegt að afrita þurfi öll gögn, en þá er það einnig gert með sjálfvirkum hugbúnaði (sbr.Norton Ghost).

Ég skil einfaldlega ekki hvernig stendur á því að viðgerðarmenn á tölvuverkstæðum finna barnaklám á tölvu. Ég er ekki að gera lítið úr glæpnum eða verja þennan mann, ég fatta bara ekki af hverju viðgerðarmaður er að gramsa í gögnunum á annað borð. Hvað með persónuleg gögn fólks? Má það eiga von á því að viðgerðarmenn á tölvuverkstæðum séu að skoða einkabréf, ljósmyndir og jafnvel yfirlit yfir það sem fólk hefur skoðað á vefnum?