Hvernig stendur á því að maður er dauðþreyttur í vinnunni eftir fríið, á maður ekki að vera endurnærður? Hvað um það, ég er ansi þreyttur.

Við skelltum okkur í Heiðmörk í gær og röltum þar um í rúman klukkutíma. Ég þekki Heiðmörk fyrst og fremst útfrá Garðabæjarhlutanum en í gær gengum við um Reykjarvíkurhluta Heiðmerkur, ég þekki ekki örnefnin. Þetta er fallegt og gróið svæði. Alltaf finnst mér jafn skrítið að vera kominn í myndarlegan skóg rétt við borgarmörkin. Göngutúrinn lagðist misvel í fjölskyldumeðlimi, Kolla var óskaplega lítið glöð með þetta umstang og kvartaði mikið. Við vorum í raun ósköp fegin þegar var vorum komin aftur að bílnum þrátt fyrir að það væri afar huggulegt að rölta um svæðið.

Ég eldaði kjúklingarisotto og focaccia brauð í gærkvöldi, hálfa uppskrift af hvoru. Ég man satt að segja ekki eftir að hafa eldað hálfa risotto uppskrift áður, nota alltaf fullan poka af grjónum (500gr) en bara hálfan í þetta skipti. Ekki frá því að það sé dálítið auðveldara að eiga við þetta þannig. Maturinn kláraðist að sjálfsögðu allur. Yfirleitt elda ég alltof mikið, það væri kannski ráðlegt að fara að minnka það sem eldað er.

Óskaplega fannst mér Bananas fyndin. Flissaði eins og fífl útaf aulabröndurum Allen. Þetta er ekki fyrir alla.

Blóðbankinn sendir tölvupóst og betlar úr mér blóð. Kemst því miður ekki í dag, er bíllaus. Kíki á morgun.

Ég seldi gömlu aðdráttarlinsuna í gær. Var alltaf að fara að auglýsa hana hér og á lmk vefnum en svaraði svo pósti á lmk í gær og stuttu síðar var linsan seld, þó ekki þeim sem þar óskaði eftir linsu. Magnað þetta internet. Linsuna seldi ég þar sem ég keypti nýja (gamla) um daginn og a) hafði ekkert við tvær aðdráttarlinsur að gera, b) þurfti að fá fé upp í kaupin á nýju linsunni og c) kom ekki öllum linsunum fyrir í myndavélatöskunni.