Útskrift í leikskólanum

Í morgun (tja, gærmorgun reyndar) mættum við í leikskólann þar sem Kolla og hinir krakkarnir í elsta árgangnum voru að klára vísdómsstarfi. Það var semsagt útskrift þar sem krakkarnir fengu afhentar vinnubækur og sungu fyrir foreldra. Kolla á ósköp auðvelt með allt svona, stressar sig ekkert á því að standa fyrir framan fólk og gera eitthvað.

Foreldrar kepptust við að taka myndir, þetta var hálfgert kraðak á tímabili. Ég gat ekki gert að því að mér þótti unga rauðhærða móðirin sem tók tugi mynda af hnakkanum á drengnum sínum dálítið skondin, en hún á vafalítið góða hnakkamynd núna. Svo skil ég ekki þessa ofnotkun á flassi, allir poppa upp flassinu sínu og flassa út og suður þrátt fyrir að nóg væri að bumpa iso í 400. Ég tók semsagt fáeinar myndir.

Á leiðinni heim í kvöld bauð strætó upp á óvæntan göngutúr úr Mjódd. Þegar ég steig upp í vagn 17 fyrir framan Laugaveg 178 fékk ég skiptimiða og bað bílstjórann að biðja S3 að bíða eftir mér (vagnarnir eiga að fara á sama tíma frá Mjódd). Bilstjórinn muldraði eitthvað sem ég skyldi sem samþykki en þegar í Mjódd var komið var vagninn 2-3 mínútum of seinn og S3 farinn. Þess má geta að 17 lagði of seint af stað frá Hlemmi.

Ég tók nokkrar myndir á röltinu [1, 2, 3].

Annars er ég þreyttur í bakinu, bara svo það komi fram.