Palli lánaði mér þessa bók eftir golfið um daginn og ég kláraði hana áðan.

Þetta er afar áhugaverð bók fyrir stuðningsmenn Liverpool. Reyndar er bókin skelfilega illa skrifuð, mikið um endurtekningar og svo er málfarið afskaplega sérstakt (Scouse). Það hefði einhver grimmur ritstjóri mátt fara yfir bókina og strika yfir það sem áður hafði komið fram. En mér fannst bókin ansi skemmtileg, það er gaman að skyggnast bak við tjöldin hjá Liverpool og enska landsliðinu (Leeds og City líka, jújú). Maður á það til að gleyma því hve magnaður leikmaður Fowler var, algjört undrabarn þegar hann hóf að spila með aðalliði Liverpool og skoraði rúmlega þrjátíu mörk á hverju tímabili.

Frásagnir af umgjörðinni í kringum Liverpool eru fróðlegar og gaman að heyra hans sjónarmið á þá knattspyrnustjóra sem stýrt hafa liðinu. Augljóst er að Fowler líkar ekkert mjög vel við Gérard Houllier. Ég hef heyrt á spjallborðum að Fowler hefði mátt sleppa þeim kafla eða tóna hann niður þar sem hann virki ansi bitur i þeirri umfjöllun þegar hann kennir Houllier um að hafa hrakið sig burt, en ég get skilið Fowler og finnst umfjöllunin um þetta ansi góð.

Sögurnar af leikmönnum sem hann hefur spilað með eru margar lygilegar, þetta eru náttúrulega "vitleysingar" upp til hópa og Fowler er duglegur að benda á það að þetta séu ekkert afskaplega skarpir náungar, hann sjálfur meðtalinn. Gazza virðist vera snarruglaður, Collymore og Anelka fá ekki jákvæða umsögn og ég skil vel að menn hafi ekki viljað deila hótelherbergi með David James.

Fræg atvik eru útskýrð eins og t.d. þegar Fowler "sniffaði" línuna, sneri rassinum að Graeme Le Saux og ruglið þegar hann hefur komist í kast við lögin. Kannski er maður grænn, en mér finnst skýringar Fowler á þessum atriðum góðar, þó hann sé ekki að gera of lítið úr sínum hlut, margt af þessu var náttúrulega algjört bull.

Það er einkar ánægjulegt að lesa þessa bók vitandi það að Fowler fór aftur til Liverpool nokkrum mánuðum eftir að bókin kom út. Það er alveg ljóst við lesturinn að hann vildi aldrei fara frá liðinu og hann tekur það oft fram að hann vildi helst vera kominn aftur til Liverpool. Nú er bara að vona að hann klári ferilinn með stæl og nái að vinna titla með liðinu sínu.