Verslunarmannahelgarveðurspáin

Óskaplega er vandræðalegt að fylgjast með veðurfréttamönnum sem þora ekkert að segja um veðrið næstu helgi. Allar spár benda til þess að það verði rigning um allt land alla helgina. En nei, "spám ber ekki saman"!

Af hverju í ósköpunum þarf að hafa alla þessa fyrirvara núna? Jújú, þau þora ekki að styggja þá sem halda samkomur um helgina, en fjandakornið, segið bara það sem ykkur finnst! Fólk þarf að ákveða hvert það ætlar að fara um helgina og veðrið spilar stórt hlutverk. Þessi gunguskapur veðurfréttamanna er gjörsamlega óþolandi.

Annars finnst mér að það megi setja líkur með spánni þegar spáð er lengra fram í tímann. T.d. mætti standa í horninu 30% til merkis um að menn telji 30% líkur á að spáin rætist. Þrátt fyrir að vita afar lítið um verðurspádóma gæti ég trúað því að það sé afar misauðvelt að spá fram í tímann, svona eftir því hvernig lægðirnar eru að haga sér hverju sinni.

Ég tel 90% líkur á rigningu um allt land næstu helgi. Haldið ykkur heima, farið á innipúkann eða glápið á sjónvarpið.