Fór í Blóðbankann í hádeginu og lagði inn. Það gekk ekki alveg áfallalaust fyrir sig því ekkert blóð streymdi úr æðum mínum þó nálin væri komin á kaf í handlegginn. Hóað var í eldri og reyndari hjúkku (sú sem sá um mig var samt ekkert unglamb) og sú reynda skakaði nálinni til þar til blóðið frussaðist í slönguna. Alltaf fjör í bankanum. Ég skráði mig sem stofnfrumugjafa.

Skrapp á Ítalíu með Gyðu eftir blóðfórnina. Þar fengum við ágætt pasta en ekki frábært. Brauðið sem kom með réttunum var ansi gott en appelsínið hennar Gyðu var ekkert óskaplega líkt appelsíni á bragðið.

Ég rakst á viðtal við biskup þjóðarinnar í tímaritinu Ský (þriðja tölublað 2006). Óskaplega er maðurinn bitur út í trúleysingja!

En hvernig er sá á vegi staddur sem engu trúir og á sér enga trú? Er líf þess einstaklings tómlegt? Karl segist ekki viss um að svo sé og telur raunar að fáir eigi sér enga trú. Sú vantrú sem Richard Dawkins og hans nótar boða sé einsýn, stútfull og löðrandi af fordómum og hatri. "Ég virði alla heiðarlega glímu við vanda tilverunnar og ráðgátur lífs og dauða. En hatursfullur áróður eins og gjarnan birtist af hálfu þeirra sem kenna sig við vantrú er annarrar ættar. Þar á ég við árásir á það sem heilagt er: virðingarleysi, yfirgang og gjarna ofbeldi í orðum. Framtíðin þarfnast trúar en ekki hvaða trúar sem er. Til er hættuleg trú sem fjötrar og nærist á fordómum, ótta og vanmetakennd. Sjálfur þekki ég marga efagjarna húmanista sem eru fólk með góðan vilja. Ég ber mikla virðingu fyrir þeim og allri heilbrigðri gagnrýnni og skynsamlegri hugsun. Út frá mínum kristnu forsendum skilgreini ég trú sem tryggð, traust og virðingu fyrir því sem æðra er, fyrir lífinu og náunganum." (Feitletranir Matti Á.)

Dálítið gaman að sjá svona sterka vísun í Vantrú hjá biskup; "sem kenna sig við vantrú" :-) Ætli einhverjir reyni ekki að túlka þetta þannig að hann sé að tala um einhverja allt aðra. Annars hljóma ásakanir biskups óskaplega kunnugleg, "góðkunningi" Vantrúar hefur verið duglegur að setja fram svipaðar ásakanir í gegnum tíðina en tekst aldrei að rökstyðja þær þegar á hann er gengið. Biskup er í þeirri heppilegu stöðu að þurfa ekki að rökstyðja neitt sem hann segir.

Séra Gunnar Jóhannesson svarar grein Óla Gneista í Morgunblaðinu í dag. Takið eftir því hvernig presturinn byrjar pistilinn sinn á því að gera Óla Gneista upp ofsa og persónuárásir þegar slíkt er hvergi að finna í grein Óla. Þarna styðst presturinn við uppáhalds gvuðssönnun mína :-)

Í grein sinni gerir Óli Gneisti athugasemdir við fáein atriði í grein minni með nokkuð stóryrtum hætti og vænir mig m.a. um að ýkja og oftúlka orð Dawkins. Þó að mér sé það sárt að umræða sem mér er annt um fari að snúast um persónur fremur en málefni þá finnst mér rétt að svara Óla Gneista hér.