Við hjónin kíktum á Þrjá frakka í hádeginu í tilefni dagsins.

Fengum okkur hráan hval að japönskum sið (1790) í forrétt. Gyða fékk sér plokkfisk (1650) í aðalrétt og ég fékk mér steiktar gratineraðar gellur (1790) (þessi verðlagning miðast við hádegið). Það er langt síðan ég fékk mér gellur, amma á Sigló eldaði reglulega steiktar gellur með brúnni smjörsósu í gamla daga og það var eitt það allra besta sem ég fékk.

Gellurnar á þremur frökkum voru ólíkar gellunum hennar ömmu en afar góðar. Það lá við að rétturinn væri of löðrandi en þetta slapp fyrir horn.

Hvalurinn var einstaklega góður og Gyða var ánægð með plokkfiskinn. Þjónustan góð, dálítið þröngt setið en það var bara forvitnilegt að hlusta á viðskiptahádegisverðarhópinn á næsta borði.

Ég mæli með þremur frökkum í hádeginu, frábær matur, góð þjónusta og hófleg verðlagning.