Uppþvottavélin kláraði heilt prógramm í kvöld þegar ég prófaði í fjórða eða fimmta skipti, frásagnir af andláti hennar voru eitthvað ýktar. Ég skrúfaði reyndar fyrir og svo aftur frá vatnsinntaki fyrst, kannski hafði það eitthvað að segja. Líklega skipti það engu máli. Vonandi þraukar vélin eitthvað aðeins áfram. Annars hafa fimm diskar verið látnir duga þessa dagana, merkilega hvað maður notar lítið leirtau þegar það þarf að vaska allt með gamla laginu.

Kolla var óskaplega ánægð með daginn og hafði frá miklu að segja, eignaðist vinkonu og allt. Mundi reyndar ekki alveg hvað hún heitir, en það kemur. Þetta er frábært ævintýri. Við leggjum okkur fram um að sýna Ingu Maríu líka athygli enda er hún núna eina leikskólastelpan og auk þess ein af stóru krökkunum í leikskólanum.