Verð á bíómiðum - ótrúverðug skýring Senu
Ég fór í fyrsta sinn í hálft ár í kvikmyndahús í gærkvöldi. Meðal þess sem ég minnist á í bloggfærslunni er verðið á bíómiðanum. 1200 krónur kostaði inn á Mýrina.
Svo skemmtilega vill til að í Fréttablaðinu í dag er fjallað um verð á bíómiðum (bls. 78), en almennt miðaverð hækkaði nýlega úr 800 í 900 krónur.
"Miðaverðið hefur verið 800 krónur í fimm ár og nefndu mér eitthvað sem hefur ekki hækkað á þeim tíma," segir Björn Sigurðsson, framkvæmdastjóri Senu sem sýnir Mýrina. Hann segir launakostnað og annan rekstrarkostnað kvikmyndahúsa hafa hækkað umtalsvert á tímabilinu og hækkunin nú sé því tímabær.
Mig langar til að benda Birni á eitt sem ekki hefur hækkað á síðustu fimm árum. Dollarinn hefur lækkað á þessu tímabili en langflestar kvikmyndir eru keyptar frá Bandaríkjunum. Á sínum tíma var hækkun á bíómiðum réttlætt með hækkun dollarans en ekkert gerðist þegar dollarinn snarféll í verði. Málstaður Senu og annarra sem selja kvikmyndir á Íslandi er ekkert sérlega góður.
(grafið er tekið af heimasíðu Landsbankans og sýnir gengisþróun dollarans á tímabilinu október 2001 til október 2006)
Freyr - 25/10/06 12:01 #
Gæti verið að rekstrarkostnaður hafi hækkað umfram lækkun dollarsins? Mér skilst að það sé erfitt að halda starfsfólki í vinnu þessa daganna og það kæmi mér ekki á óvart að þeir hafa þurft að auka launakostnað töluvert.
Þetta er bara hugleiðing, ég hef engar heimildir fyrir þessu.
Óli Gneisti - 26/10/06 01:09 #
Ég efast um að það þurfi að selja marga bíómiða til að kosta hvern starfsmann þarna.