Helvítis ísskápurinn okkar er dauður. Hitastigið í honum rokkar á milli 15-20° sem er hlýrra en í stofunni okkar áður en við létum gera við ofnana. Frystirinn hefur ekki fryst í nokkra mánuði.

Það er ekki nema rétt rúmlega ár (mikið óskaplega líður tíminn hratt, ég hefði getað svarið að það væri um hálft ár) síðan ég lét gera við ísskápinn fyrir um sjötíu þúsund krónur, þannig að þetta er ansi blóðugt. Borgaði níutíuþúsund fyrir skápinn fyrir fimm árum, keypti hann notaðan af Ásmundi frænda. Reyndar hefur ísskápurinn aldrei verið í lagi, vatnskúturinn var ónýtur þegar við fengum hann, væntanlega vegna þess að hann hefur frosið í geymslu og því lak alltaf vatn á gólfið þegar við reyndum að fá okkur vatn að drekka en klakavélin virkaði þó. Nú virkar ekkert.

Þegar maður hefur vanist því að vera með tvöfaldan ískáp með klakavél er dálítið freistandi að kaupa sér annan slíkan, en staðreyndin er að peningar vaxa ekki á trjánum, jafnvel þó græjukaup þau er ég stæri mig af á þessari síðu af og til bendi til annars. Þannig að nú þurfum við að kaupa nýjan ísskáp og það strax, það er engin lausn að geyma matvörur úti á svölum :-)