Við kíktum í Smáralind í kvöld eftir að ég var búinn í innibolta. Áttum eftir að kaupa nokkrar gjafir. Redduðum því í fljótheitum, fundum fínar gjaftir handa þeim ættingjum sem yfirleitt er erfiðast að versla fyrir.

Borðuðum kvöldmat á Energia. Fengum þar góðan mat, ég borðaði Kjúklingasalat Milano með afar ljúffengri Mangó dressingu og Gyða fékk sér Teriaky kjúkling. Kolla fékk samloku og Inga María pasta. Fín þjónusta og góður matur á sanngjörnu verði, það eina sem ég var ósáttur við voru reykingarnar, þetta er alltof lítill staður til að það gangi upp að þar sé verið að reykja. En ég þarf að finna svona Mangó-dressingu, þetta hlýtur að vera til í einhverjum búðum. Ég spurði, þau kaupa hana tilbúna frá heildsala.

Þegar við gengum út af Energia rákumst við á Ásmund, Hörpu og stelpurnar sem voru á kaffihúsinu hinum megin við ganginn. Settumst hjá þeim og spjölluðum í góða stund meðan Kolla, Inga María og Ásthildur léku sér saman.

Í Ormsson keyptum við eina jólagjöf og þar prófaði ég Nintendo Wii í örstutta stund. Leikurinn sem var í tölvunni var reyndar ekkert sérlega góður til að prófa stýripinnann merkilega en þetta er forvitnileg græja.