Umfjöllun Blaðsins í dag um leik kvöldsins endar með þessum orðum:

Sóknarlína liðsins ber þunga byrði og liðið þarf helst tvö mörk enda vilja menn Rafa væntanlega ekki lenda í vítakeppni á móti hinum gallharða Petr Cech sem er töluvert betri markvörður en Pepe Reina hjá Liverpool.

Ég tel að það þurfi ekkert að deila um að Petr Cech er frábær markvörður og vafalaust sá besti á Englandi í dag, ef ekki heiminum. En að segja að hann sé "töluvert betri" en Pepe Reina stenst enga rýni.

Ef við skoðum tölfræði kappanna, þá er Pepe Reina sá markvörður í Englandi sem oftast hefur haldið marki sínu hreinu síðustu tvö árin, í fyrra hélt hann marki Liverpool hreinu í 20 leikjum af 34, á sama tímabili hélt Petr Cech marki sínu hreinu í 17 af 34 leikjum. Bæði þessi lið hafa sterkar varnir og því varla hægt að þakka vörn Liverpool allan þennan árangur. Á þessu tímabili hefur Reina einnig haldið hreinu oftar en nokkur annar en Cech missti af nokkuð mörgum leikjum vegna meiðsla, reyndar er tölfræði Cech í þeim leikjum (eftir að hann koma aftur) með ólíkindum, en Chelsea hefur verið á nokkuð góðu flugi síðustu tvo mánuði. Vissulega hefur Reina gert mistök en það sama gildir um Cech.

Svo er það hitt, þarna er sérstaklega verið að tala um vítaspyrnukeppni og Pepe Reina er þekktur vítaspyrnubani. Tölfræði Reina í vítaspyrnum er með ólíkindum, í úrslitaleik FA bikarsins í fyrra varði hann 3 af fjórum vítaspyrnum og þegar hann spilaði með El Madrigal Villa Real varði hann 7 af 9 vítaspyrnum!

Þrátt fyrir þetta er ég dauðstressaður fyrir leik kvöldsins, en ef leikurinn endar í vítaspyrnukeppni verður það ekki Pepe Reina sem ég mun hafa áhyggjur af.