Nîmes
Þennan dag skellti öll hersingin sér í dagsferð til Nîmes en þangað var um 2 klst akstur frá bænum okkar. Við byrjuðum eftir smá akstur á því að stoppa við vegasjoppu/bensínstöð til að taka bensín og fá okkur morgunmat.
Er við komum til Nîmes ókum við í miðbæinn og lögðum í bílastæðahúsi. Eins og vanalega vísaði Garmin tækið veginn. Merktum staðsetningu bílastæðahússins í tækið og röltum beina leið að hringleikahúsi með hjálp græjunnar ómissandi. Byrjuðum á því að borða hádegismat, ég fékk mér sjávarréttasalat sem var ekkert sérstakt.
Fórum svo í lestarferð um bæinn. Reyndar var þetta varla lest heldur vagnar sem dregnir voru um götur bæjarins. Stundum fannst mér ansi þröngt um lestina en hún komst alla leið.
Að lestarferð lokinni röltum við að hringleikahúsinu og skoðuðum okkur um. Hringleikahúsið er ansi magnað og saga þess fróðleg. Við stoppuðum í um einn og hálfan tíma þar í rosalegum hita. Stundum var gott að leita inn í skuggann. Það verður að segjast eins og er að Gyða og Gunna voru ansi móðursjúkar í hringleikahúsinu, þegar ég rölti með Kollu og Ingu Maríu í efstu palla hringleikahússins leist þeim ekkert á blikuna og létu heyra í sér. Það skal tekið fram að það var engin hætta í gangi.
Eftir hringleikahús röltum við af stað og enduðum á ísbar. Fengum okkur öll myndarlegan ís í hitanum.
Kíktum þvínæst á hofið á aðaltorginu. Þar var verið að sýna þrívíddar kvikmyndasýningum sem fjallaði um hetjur svæðisins. Dálítið klént en samt áhugavert. Inga María beið úti með afa sínum. Kolla varð ansi hrædd á sýningunni, dætur mínar voru ekkert sérlega hugrakkar í Frakklandi.
Þá var kominn tími til að halda heim á leið. Ákváðum að stoppa í Greoux og borða kvöldmat. Ég var grand á því og pantaði mér það dýrasta á matseðlinum án þess að hafa hugmynd um hvað það væri. Það reyndist fiskur sem sem mér fannst ekkert spes. Ég splæsti kvöldmat á hópinn í þetta skipti. Stelpurnar borðuðu skeljar og franskar - það líkaði þeim alltaf vel í Frakklandsferðinni. Klukkan var langt gengin í ellefu þegar við yfirgáfum veitingastaðinn og héldum heim á leið eftir langan og góðan dag.
Þegar við vorum komin aftur í húsið var ennþá funheitt þó það klukkan væri margt og löngu orðið dimmt. Ég fór í tölvuna og ráfaði á netinu. Fékk mér tvo bjóra og svitnaði vel. Fór að sofa rúmlega tvö.
