Mikið óskaplega var góð stemming í bænum í dag. Veðrið yndislegt og allir í góðu skapi.

Við fórum að sjálfsögðu á Gaypride en þetta skipti var ólíkt fyrri þar sem nokkrir vantrúarsinnar tóku að sér að aðstoða fólk við að breyta trúfélagsskráningu. Ég var þess vegna ekki með stelpunum meðan skrúðgangan var í gangi. Fólk tók ótrúlega vel í aðstoð okkar og margir breyttu trúfélagaskráningu sinni, lang flestir skráðu sig utan trúfélaga en nokkrir í Fríkirkjuna, Ásatrúfélagið og a.m.k. einn í Kaþólsku kirkjuna. Ég var nú ósköp slakur í þessu en aðrir voru með þetta alveg á hreinu, sérstaklega Kári Svan. Ég þarf að fara í námskeið í að ganga upp að fólki og bjóða eitthvað svona :-) Sverrir mætti í kjól og var afskaplega glæsilegur - það skortir ekki hugrekki og framfæri á þeim bænum.

Sátum svo í geggjuðu veðri á Arnarhól, þvílík blíða. Hittum Jónu Dóru, Óttar og Ásdísi Birtu þar. Hittum svo foreldra mína við Red Chili seinna um daginn.

Ljósmyndari Morgunblaðsins tók mynd af Áróru og Gyðu, Gyða sagði mér að hann hefði komið alveg upp að Áróru og svo sáum við myndina í myndasyrpu á mbl.is

Ég skellti mér á Gaukinn klukkan fimm og sá seinni hálfleik Liverpool leiksins, hélt að leikurinn hæfist klukkan fimm. Fagnaði vel þegar Gerrard skoraði sigurmarkið. Borgaði 700kr fyrir Stella í flösku, það finnst mér helvíti mikið.

Ég tók nokkrar myndir, en færri en oft áður þar sem ég var upptekinn við annað.