Jólatréð er komið á sinn stað í stofunni. Klárum að skreyta það á morgun. Nokkrir pakkar komnir undir tré, hrúgan kemur á morgun. Verðum með möndlugraut í hádeginu og skiptumst þá á pökkum við flesta. Þurfum frekar lítið að hafa fyrir pakkaskiptum.

Kalkúnninn þiðnar í eldhúsinu, tók hann úr frystikistunni í fyrradag og setti í ísskápinn, tók hann svo úr ísskápnum í dag. Ég byrja á fyllingunni í fyrramálið, hún er frekar einföld - tekur um klukkutíma að útbúa hana allt í allt.. Morgundagurinn fer svo í að huga að fuglinum, sprauta yfir hann og þessháttar. Ég ætla að hafa lítið fyrir forrétti og hef því humar. Einfalt og klikkar aldrei.

Fórum út í kvöld og borðuðum kvöldmat á Austurlandahraðlestinni í Kópavogi. Mikið óskaplega finnst mér maturinn þeirra góður.

Ég var að fara í gegnum myndasafnið og fletti meðal annars í gegnum myndir sem ég tók á balletsýningu í maí. "Uppgötvaði" þessa mynd hér til hliðar og skellti henni á flickr síðuna. Þyrfti að fletta oftar í gegnum myndasafnið. Þyrfti líka að skipuleggja myndasafnið betur, tagga myndir og nota forrit eins og Lightroom eða eitthvað álíka til að flokka myndir.

Annars er þetta búið að vera rólegt og stresslaust eins og þetta á að vera.