Ég fór með Áróru, Kollu og Ingu Maríu í páskaeggjaleiðangur í kvöld. Við vorum of sein í Bónus og héldum því í Hagkaup Skeifunni. Þar tóku stelpurnar sér góðan tíma í að velja sér egg, svo góðan að óþolinmóður faðir þeirra var byrjaður að tuða um að hann gæti bara séð um að velja eggin sjálfur. Allar völdu þær hógvær páskaegg og hefðu eflaust fengið stærri ef húsbóndinn hefði farið einn að versla. Eitt egg var verslað handa húsmóðurinni sem enn hangir í vinnunni í kvöld eins og flest undanfarið.

Eftir Hagkaup komum við við á þvottaplaninu við Olísstöðina í Álfheimum og ég skolaði Skálafellsdrulluna af jeppanum. Var ekki lengi að því og að því loknu brunuðum við á veitingastað sem stelpurnar fengu að velja, þær völdu að sjálfsögðu McDonalds. Allt er gott í hófi og allt það. Þegar ég gekk inn á McDonalds og fálmaði eftir seðlaveskinu greip ég í tómt. Hersingin fór því aftur út í bíl, brunaði í Hagkaup en þar var ekkert veski. Þvínæst var brunað út á þvottaplan þar sem veskið lá í góðu tómi þar sem ég hafði skolað bílinn - dálítið blautt en innihaldið það sama og áður. Ég er næstum aldrei með seðla í veskinu!

Stúlkurnar gátu því fengið hamborgara með msg-bragði og msg kryddaðar djúpsteiktar kartöflur eins og þær óskuðu, Inga María var frumleg og fékk sér nagga. Ég setti fullt fullt af tómatsósu á hamborgarann minn.