Eldsneytiskvabb

Áttunda janúar borgaði ég í fyrsta skipti meira en níu þúsund krónur fyrir eldsneyti. Aðfararnótt föstudags borgaði ég rúmlega tíu þúsund krónur þegar ég fyllti á tankinn á heimleið úr vinnu. Þetta var semsagt í fyrsta skipti sem ég sá fimm stafa tölu er ég fylli á bílinn. Á ég að trúa því að ég muni fylla tankinn fyrir ellefu þúsund krónur á árinu? Eflaust er stutt í það. Ég hefði reyndar getað farið daginn áður og sparað um tólf hundruð krónur - en þá hefði ég þurft að fresta kvabbi.

Einhverjum þykir þetta eflaust gott á mig. Ég geti sjálfum mér um kennt að aka um á litlum dísel jeppa. Reyndar var ein ástæða þess að ég keypti dísel bíl á sínum tíma að ég taldi (og hafði góðar ástæður til að halda) að verð á dísel yrði hagstæðara en á bensíni.

Ég fyllti tankinn síðast þar á undan í Borgarnesi 22.3 - ók þann dag í Hvalfjörð (göngin voru lokuð) á móti Áróru og svo daginn eftir í bæinn. Ók 516km á tanknum og eyddi að meðaltali 12,7 lítrum á hundraði. Þarf að tékka á loftþrýstingi á dekkjum, mér þykir þetta frekar mikil eyðsla miðað við hlutfall utanbæjaraksturs á tímabilinu.

Fyrir ári, 17. apríl 2007, borgaði ég 114,1.- kr fyrir líter af díselolíu. Í þetta skipti 154,8.- kr. Þetta er hækkun upp á 36,57% - sem er þokkalegt.