Helgin var tíðindalítil eins og yfirleitt. Ég skellti mér á Players í hádeginu á laugardag og horfði á Liverpool leikinn. Á miðvikudag var Liverpool heppið að ná stigi en í þessum leik hefði varalið Liverpool átt að vinna leikinn, var betra nær allan tímann og átti betri færi, sérstaklega píparinn Voronin.

Fór í innibolta klukkan fimm á laugardag. Það var skelfilegt. Ég var slakur og liðið mitt spilaði hörmulega - ég lét allt fara í taugarnar á mér og var ógurlega pirraður. Ég svitnaði þó.

Fjölskyldan fór út að borða á laugardagskvöldið. Fórum á Ruby Tuesday á Höfða. Það er alveg ágætis staður, maturinn ekki merkilegur en þessi tegund staða hentar ágætlega fyrir fjölskyldur. Rifin eru líka fín, enda erfitt að klúðra forelduðum svínarifjum. Þetta er Hard Rock með lægri tónlist.

Eftir mat fórum við smá rúnt, kíktum á sólsetur í vesturbænum, fengum okkur ís í ísbúðinni Álfheimum (sem er ekki lengur í Álfheimum) og ókum svo upp að Hafravatni þar sem ég reyndi að taka myndir af norðurljósum. Það gekk ekkert alltof vel og stelpurnar nenntu ekki að bíða meðan ég bisaðist við að taka myndir. Næst fer ég einn í norðurljósatökur :-)

Í gær fórum við í fermingarveislu hjá Karítas. Kíktum svo í Elkó þar sem ég fann enga almennilega vasamyndavél handa Gyðu. Sá nokkra 50" flatskjái sem ég væri alveg til í að eiga en er ekkert á leiðinni að fjárfesta í slíku tæki, tími nefnilega ekki að borga fyrir aðgang að sjónvarpsefni í HD og þá er tilgangslítið að eiga hágæðaskjá. Í staðin endurnýjaði ég loks nefháraklippurnar! Hversu sorglegt er að eiga slíka græju?

Talandi um nefháraklippurnar, það var mynd af hjónunum sem stálu mínum í helgardagblaðinu. Það á víst að fara að taka mál fyrir gegn þeim en ég veit ekki hvort okkar innbrot er hluti af því. Samkvæmt upptalningu í fréttinni virðist það ekki vera inni í þessu heldur er um eldri mál að ræða.

Nokkrar myndir