Hjólið mitt kemur ekkert alltof vel undan vetri. Hefur staðið úti eftir að ég þurfti að koma bílnum hennar Gyðu inn í bílskúr.

Þetta er Hagkaupshjól, keypt fyrir sjö - átta árum minnir mig. Svosem sæmilegt fjallahjól með dempara að framan. Handföngin (gúmmí) eru að detta af og gírarnir eru leiðinlegir - það er vesen að skipta aftur upp á fremri gírum. Ég hef aldrei keypt bretti á hjólið sem er dálítið leiðinlegt þegar það er blautt úti. Keðjan er ryðguð en annars lítur það þokkalega út. Ég ætla að skella olíu á það í kvöld og pumpa í dekkin.

Ég ætla að hjóla í vinnuna í sumar og spurningin er hvort ég tjasla upp á gamla hjólið eða kaupi mér nýtt almennilegt hjól.

Hvar er hagstætt að láta stilla gíra og lappa upp á hjólið?

Ætti ég frekar að kaupa mér nýtt almennilegt hjól. Hvar og hvernig hjól? Ég hef alveg efni á sæmilegu hjóli og ætti náttúrulega að leyfa mér það ef það verður til þess að ég hjóla meira. Á maður kannski ekki að leyfa sér svona útgjöld nú þegar kreppa er í aðsigi? Fjarlægðin í vinnuna er um 5.5km, 11km fram og til baka. Miðað við verð á dísel og vetrareyðslu kostar eldsneyti um 220kr fyrir þennan spöl en maður keyrir svosem alltaf eitthvað meira. Spurning hvort ég þurfi mikið að skutlast, ætti að geta sloppið við það ef stelpurnar rölta í og úr frístundastarfi og íþróttum í sumar.

Æi, vesen.