Eitt af því sem við elduðum í bústaðaferðinni var grillaður humar með beikon og ananas.

Ég lærði þetta í foreldrahúsum. Það getur verið erfitt að grilla humar en þetta er afskaplega einfalt, krefst samt smá undirbúnings.

Ég kaupi frosinn humar sem búið er að taka úr skelinni, yfirleitt er þetta ekkert rosalega fallegur humar en hann hentar vel í þennan rétt. Ég myndi ekki tíma að nota stóran úrvalshumar í þetta. Einnig er hægt að nota skötusel í staðin fyrir humarinn.

Fyrst er að leggja trépinna eða tannstöngla í bleyti í dálítinn tíma svo þeir brenni ekki á grillinu. Yfirleitt nota ég trétannstöngla en í bústað áttum við bara grillpinna. Það er reyndar fljótlegra á grillinu, því þá þarf ekki að snúa jafn mörgum bitum.

Ég sker beikonið í tvennt, það ætti samt að vera nægilega langt. Legg beikonið á bretti, skellir humrinum og smá ananas bita þar á og rúlla beikoninu utan um. Festi þetta saman með pinnanum.

Svo er þetta grillað við þokkalegan hita, þar til beikonið er tilbúið. Tekur engan tíma og því þarf maður að vera vel vakandi við grillið. Það þarf að reyna að ná jafnvægi, beikonið verður að vera alveg eldað en forðast þarf að ofelda humarinn.

Borðað sem allra fyrst, helst með hvítvíni. Hentar vel sem forréttur eða snarl.

Einnig getur verið gott að nota döðlur í staðin fyrir ananas, ég hef reyndar aldrei eldað það sjálfur en smakkað hjá öðrum.