Halla moggabloggari segir frá því að sonur hennar er að byrja í leikskóla. Þó hún sé trúlaus (held ég) finnst Höllu að barnið eigi að taka þátt í trúboði (heimsóknum djákna í leikskólann) og segir um leið að henni finnist vantrú vera trúarbrögð og ég get ekki skilið hana öðruvísi en að henni finnist þeir sem berjast gegn leikskólatrúboði vera öfgamenn. Ég sé ekki betur en að Halla sé dálítið dæmigerður sinnuleysingi í trúmálum.

Viðhorf Höllu er að mínu mati vanhugsað. Hún stillir þessu upp þannig að fínt sé að börnin fái kynningu á kristni (trúboð) og velji svo sjálf. Eins og aðrir á undan henni (t.d. Salvör Nordal) dettur henni ekki í hug að velta fyrir sér hvort barnið fái kynningu á öðru en kristni. Ef við ætlum að tala um að börn hafi eitthvað val hljótum við að boða Íslam, Gyðingdóm, Búddatrúa, Scientology, trúleysi og fleira með sama hætti og kristni - því án þess að börn þekki alla valmöguleika er ekkert raunverulegt val. Myndi einhver réttlæta kennslu í (ekki um) rasisma í leikskólum á þeim forsendum að börn þyrftu að hafa eitthvað val? (N.b. það er algjör óþarfi að draga Jón Magnússon inn í þessa umræðu)

Raunin er að það eru einungis kristnir trúboðar sem herja á leik- og grunnskóla. Engin önnur lífsskoðunarfélög reyna að stunda áróður á þeim vettvangi. Meira að segja stjórnmálaflokkar láta leik- og grunnskólana eiga sig því jafnvel þar gerir fólk sér grein fyrir því að slíkur áróður er siðlaus.

Ég segi það enn og aftur. Leik- og grunnskólar eiga að vera hlutlausir í trúmálum, þar á ekki að fara fram nein boðun. Sú boðun á heima í Sunnudagaskólum. Þangað getur trúað fólk sent börnin sín ef það vill að þau fái villandi einhliða áróður um hindurvitni trúarbragða.