Ég les öll blogg landsins og vil ekki gera upp á milli bloggara en ég ætlaði ekkert að segja frá því hér og nú.

Stundum horfi ég yfir öxlina á fólki sem ráfar inn á síðuna mína og fylgist með hegðun þess. Það getur verið fróðlegt. Ég sé hvaðan fólk kemur, hvaða greinar það skimar yfir, hvaða greinar það les og hvaða myndir vekja áhuga. Stundum sé ég líka þegar fólk byrjar að skrifa bloggfærslu með vísunum á mína síðu (fólk smellir á vísanir úr ritli) en hættir við að birta hana. Þá verð ég óskaplega forvitinn.

Mér finnst alltaf jafn undarlegt þegar einhver slysast inn á síðuna og les hana næstum því upp til agna en það gerist af og til, ég hef fylgst með fólki eyða klukkutímum í að ráfa um þetta bjánalega blogg. Fjandakornið, þetta röfl er ekki merkilegt og sjálfur myndi ég gefast upp á fimm mínútum ef þyrfti að þræla mér í gegnum þetta. Sérstaklega ef það væri meira af bloggfærslum í þessum dúr.