Byrjum gærdaginn í uppáhaldskirkjunni minni þar sem jólatónleikar tónlistarskólans hennar Kollu fóru fram. Kolla átti stórleik á þríhorn og blokkflautu, sérstaklega var lokahljómurinn á þríhornið magnþrunginn. Kolla er stendur sig vel í forskólanum og virðist hafa náð ágætum tökum á tónlistinni. Ekki fær hún það frá mér! Tónleikarnir voru vel útfærðir hjá tónlistarskólanum, hæfilega langir og gott tempó.

Eftir tónleika var hádegismatur á Arnarnesi eins og vanalega. Yngsti meðlimur fjölskyldunnar mætti í fyrsta skipti og fékk lítinn frið frá ömmu og afa. Það þurfti að stilla litlu dömunni hálfsofandi upp í allskonar myndatökur og spjalla um daginn og veginn. Hún lét sér fátt um finnast, svaf ósköp vel. Hér situr Kolla með hana í fanginu. Kolla er nokkuð spennt fyrir litlu frænku en Inga María er enn að jafna sig á því að vera ekki yngst lengur.

Þaðan fórum við til foreldra minna í Hafnafirði þar sem fjölskyldan kom saman og skar út laufabrauð. Stelpurnar skáru af miklum móð en ég hélt mig við myndatöku í þetta skipti. Það eru nokkrir listamenn í minni fjölskyldu, skera út heilu kirkjunar á laufabrauð en ég hef bara haldið mig við rúlluna í þau fáu skipti sem ég tek þátt. Kolla fékk hjálp við að skera kökuna á myndinni út en fletti sjálf.

Ég stakk af úr laufabrauðsgerð klukkan þrjú, kíkti í heimsókn til Stebba og glápti á Liverpool leik - enn eitt heimaleikjajafnteflið. Afskaplega pirrandi úrslit en þrátt fyrir það er Liverpool enn á toppi deildarinnar þar sem öll hin toppliðin gerðu líka í brækur.

Ég mætti dálítið seint í laugardagsboltann útaf fótboltaglápi. Boltinn var fínn, 11 mættir til leiks þannig að við skiptum í þrjú lið. Það er merkilegt hvað tempótið verður miklu meira þegar spilaðir eru fimm mínútna leikir heldur en þegar tvö lið spila allan tímann.

Ég fór aftur í Hafnafjörð eftir bolta en stakk af þegar aðrir byrjuðu á kvöldmat og kíkti í bæinn. Fór á Bjarna Fel með Regin og Einari þar sem við horfðum á Barcelona-Real Madrið. Drakk dálítinn bjór en við fórum snemma heim, Einar var bílstjóri. Ég var búinn með nægilega mikinn bjór til að vera á því að vera lengur í bænum en ekki nennti ég að fara einn á rölt. Eftirá verð ég að játa að það var afskaplega gáfulegt að fara snemma heim.

Hér eru nokkrar myndir frá laugardeginum.

Í dag var opin æfing í fimleikunum hjá Ingu Maríu, þá mega foreldrar og systkyni semsagt mæta og horfa á æfingu. Eftir æfinguna mega svo allir leika sér í tækjunum. Enn og aftur hélt ég mig bakvið myndavélina - held ég það væri hvorki gott fyrir fæturnar á mér né fimleikatækin að ég færi eitthvað að hamast. Tók nokkrar myndir, mikið óskaplega munar miklu að geta gleymt iso-inu við svona myndatökur!

Restin var svo róleg, ég eldaði kjúklingavængi í kvöld og svo höfum við glápt á sjónvarpið.

Ég tók semsagt hrúgu af myndum um helgina, lang flestar með 50mm linsunni en fimleikamyndirnar með 80-200.