Örvitinn

Humarsúpan hans Braga (fyllerísskýrsla)

Ég er ekki vanur að skrifa ítarlegar fyllerísskýrslur en fyrst óskað er eftir því í kommenti er við hæfi að gera undantekningu.

Á laugardaginn hélt laugardagsboltahópurinn smá skrall strax eftir bolta. Bragi hélt matarboð og eldaði humarsúpuna sem hann lofaði síðasta sumar. Þetta var alvöru súpa, sett í pott daginn áður og soðin niður í tvígang, chili í lokin og fullt af humar. Afskaplega gott. Ég þarf að fá ítarlega leiðbeiningar hjá Braga og læra að elda svona súpu sjálfur.

Sátum og sumbluðum, spiluðum smá póker fyrir Egil (og svindluðum ekkert í þetta skipti svo hann fór heim með vinningin, ég skulda honum þúsund krónur). Svo var það fótboltatrúnó það sem eftir var kvölds, myndband með Maradona í tækinu og blaður um hæfileika okkar í knattspyrnu (samdóma álit okkar að við séum bestir). Í ljós kom að Ingi er ekki alveg sáttur við læknamafíuna (auk þess: verðbréfasala, alþingismenn, afgreiðslumenn í stórmörkuðum, hárgreiðslukonur og dverga).

Áfengið fór misvel í menn. Bragi bauð upp á smá viskí (sem hann tímdi skiljanlega eiginlega ekki að gefa okkur) og afskaplega gott tekíla (ekki salt og sítrónu, þetta var eðal drykkur sem maður sötraði á eins og eðal viskí). Bjarki gerðist þreyttur eftir drykkju og póker og lagði sig. Egill og Ingi stungu af, Hákon mátti ekki vera lengi úti af því konan hans var komin tvær vikur fram yfir og Andri rauk líka frekar snemma. Við hinir röltum í bæinn og enduðum á Ölstofunni þar sem ég gerðist alltof gjafmildur og splæsti tvo umganga (ég gerist gjarnan alltof gjafmildur á fylleríum - svo er ég víst eini gaurinn í þessum hóp sem er ekki á hvínandi kúpunni). Menn létu sig hverfa einn af öðrum, ég hékk þarna alltof lengi og kom heim á ókristilegum tíma (milli fimm og sex).

Sunnudagsþynnka var í meðallagi.

dagbók