Þegar Liverpool vinnur leiki virðist það óvenju oft vera vegna þess að andstæðingurinn á slæman dag. Yfirleitt virðist ástæðan ekkert tengjast liðinu sem andstæðingurinn er að spila á móti heldur einhverju allt öðru.

Þannig getur Liverpool valtað yfir Real Madrid og Manchester United, tvö ríkustu lið veraldar, í sömu vikunni án þess að það sé liðinu að þakka.

Nú virðist sigurinn á United fyrst og fremst vera afleiðing þess að United-menn voru þreyttir ef eitthvað er að marka íþróttafréttir Morgunblaðsins, það hefur verið svo mikið að gera hjá strákunum frá Manchester.

Ekkert er talað um að Xabi Alonso var meiddur og Arbeloa meiddist í upphitun þannig að öldungurinn Hyppia þurfti að spila leikinn, Lucas Leiva var á miðjunni (ég tel þann leikmann reyndar afskaplega vanmetinn) og Torres spilaði meiddur báða leikina.

Nei, Liverpool vann bara vegna þess að United voru lúnir í löppunum. Svo vill Ferguson meina að United hafi verið betra liðið í leiknum þrátt fyrir 1-4 tap. Best þykir mér að til er fólk sem mótmælir rauða spjaldinu sem Vidic fékk á þeim forsendum að Ferdinand hefði hugsanlega mögulega getað náð á svæðið (sem er rugl).

Já, þetta er merkilegt með Liverpool. Hver veit, kannski vinnur liðið einhvern daginn leik einfaldlega vegna þess að það var betra þann daginn og leyfði andstæðingnum ekki að spila sinn bolta.