Vegna þess að við þurfum bankakerfi.

• Ef innistæður eru ekki tryggðar eru forsendur fyrir bankakerfi brostnar. Hver leggur pening inn í banka ef hann á á hættu að tapa honum? Hætt er við því að fólk geymi sparnaðinn sinn undir dýnunni.
• Ef hér er ekkert bankakerfi eru forsendur fyrir atvinnulífi brostnar. Atvinnulíf stólar á banka til að fjármagna sig og fyrir greiðslumiðlun.
• Ef hér er ekkert atvinnulíf eru forsendur fyrir byggð á landinu brostnar.

Þess vegna þurfti forsætisráðherra að lýsa því yfir fyrir fall bankanna að allar innistæður væru tryggðar. Það gerði hann til að reyna að koma í veg fyrir áhlaup á þá. Eins og við vitum gekk þetta ekki eftir og bankarnir fóru í þrot.

Hjá Leno lagði Obama mikla áherslu á að bankainnistæður væru tryggðar. Af hverju gerði hann það? Jú, til að koma í veg fyrir áhlaup á bankana og tryggja rekstur þeirra.

Það er því lítill tilgangur í að hlusta á þá sem telja að vandamálið hefði átt að leysa með því að sleppa að tryggja innistæður og láta innistæðueigendur taka skellinn. Allir hefðu tekið þann skell.

Þess má geta að innistæður mínar hefðu verið tryggðar að stærstum hluta hvort sem er miðað við lágmarkstryggingar þar sem þær voru undir 20.000 evrum (fer reyndar eftir gengi). Auk þess fór viðskiptabanki minn ekki á hausinn, þó hann sé reyndar kominn á kúpuna í dag.