Hallærislegt Breiðholtsblað
Mér finnst alltaf frekar hallærislegt þegar ég sé umfjöllun í blöðunum og rekst svo á auglýsingu frá þeim aðila sem fjallað er um í sama blaði. Breiðholtsblaðið sem barst í gær er gott dæmi.
bls. 6: auglýsing frá Birnu Benediktsdóttur höfuðbeina og spjaldhryggsjafnara (kuklara). Á bls. 14 er viðtal við Birnu.
bls. 7: auglýsing frá H-Gæðalínu, fyrirtæki sem hreinsar og fóðrar vatnslagnir. Á bls. 11 er viðtal við sölu- og markaðsstjóra fyrirtækisins.
bls. 9: stór "aðsend grein" um Svandísi Svavarsdóttur. Á baksíðu Breiðholtblaðsins er heilsíðu auglýsing frá VG með flennistórri mynd af Svandísi.
bls. 11: auglýsing frá Curves sem er heilsurækt fyrir konur. Á bls. 14 er grein um Curves í Mjódd.
bls. 12: heilsíðugrein um Ferðafélag Íslands. Það pláss síðunnar sem ekki fer undir greinina inniheldur auglýsingu frá Ferðafélagi Íslands.
bls. 13: lítil aðsend grein frá Einari Skúlasyni. Á bls. 14 er auglýsing frá Framsókn með mynd af Einari Skúlasyni.
Ég held ég hafði náð öllum tengingum í blaðinu. Lítið aðsend grein frá Davíð Stefáns á bls. 13 gæti tengst baksíðuauglýsingu. Langsótt er að tengja frétt um páskaeggjaleit Sjálfstæðismanna við auglýsingar þeirra, páskaeggjaleitin hefði væntanlega verið frétt hvort eð er.
Það vakti athygli mína að í fyrsta skipti sem ég man eftir er ekki pistill frá presti Seljakirkju. Að sama skapi er engin auglýsing frá kirkjunni í blaðinu. Ég man ekki hvor tþað voru auglýsingar frá kirkjunni áður.
Brynjólfur Þór Guðmundsson - 18/04/09 10:55 #
Sæll
Þetta er einn ljótasti bletturinn á fjölmiðlum. Ég hef kynnst því á rúmra átta ára starfsævi í fjölmiðlun hversu fast maður verður að standa í fæturnar gegn frekju auglýsenda og auglýsingasala. Hvorugir skilja að ritstjórnin verður að ráða ferðinni og skrifa aðeins um það sem henni finnst áhugavert eða eiga erindi við lesendur. Þetta er spurning um að segja satt og rétt frá eða vera reiðubúinn að ljúga að lesendum. Greinar sem birtast vegna auglýsingakaupa eða í tengslum við þær á alltaf að líta á sem lygi. Hvers vegna? Jú, vegna þess að ástæðan fyrir birtingunni er ekki sú að efnið hafi þótt áhugavert heldur vegna þess að það færir pening í budduna. Þess vegna á að setja algjört stopp á þetta. Þetta er spurning um hvort menn vilja vera blaðamenn eða "mellur á prenti".