Xabi Alonso á Laugardalsvelli

Nú er verið að orða Xabi Alonso við Real Madrid. Í fyrra var hann orðaður við Juventus og litlu mátti muna að hann færi. Í raun kom Aston Villa í veg fyrir það með því að setja alltof háan verðmiða á Gareth Barry.

Alonso var besti maður Liverpool í vetur (jú, víst) og það væri að mínu mati hrikalegt að selja hann. Ég verð niðurbrotinn (í smá tíma) ef hann verður seldur, jafnvel þó Liverpool fái helling af peningum í staðin. Að mínu mati er Xabi Alonso nefnilega einn allra besti miðjumaður í boltanum í dag.

Ætla semsagt rétt að vona að þessi orðrómur sé ekki sannur og að Xabi Alonso dreifi spilinu á miðjunni hjá Liverpool næsta vetur.

Alonso hefur sagt að hann verði áfram hjá Liverpool og Benitez hefur sagt það sama en það er ekki alltaf mikið að marka slíkar yfirlýsingar í boltanum.

Þetta verður langt sumar.