Á föstudag ókum við frá Akureyri til Egilstaða. Stoppuðum á Mývatni og fengum okkur hádegismat í Vogafjósi. Þar er boðið upp á veitingar úr hráefni af staðnum.

Mikið óskaplega langaði mig til að falla fyrir þessum stað. Því miður stóðst hann ekki væntingar.

Meðal annars var boðið upp á heimagerðann mosarella- og fetaost, reyktan silung, heimabakað hverarúgbrauð, kjötsúpu og tvíreykt hangikjöt.

Ég fékk mér mosarellaost og verð að segja eins og er, þetta var óskaplega óspennandi. Osturinn var þokkalegur og tómatarnir ekki vondir en annað er ekki hægt að segja um þetta. Þurrkaðri basiliku úr stauk var stráð yfir réttinn. Hvernig í ósköpunum stendur á því að fólk notar ekki ferska basiliku með svona rétt? Þetta ætti að vera bannað.

Mamma fékk sér salat sem var afskaplega óspennandi (kínakál, tómatar, rauðlaukur, fetaostur etc - semsagt meðlæti)en rándýrt, kostaði 2400.-, fyrir slíka upphæð mætti salatið vera spennandi og kívíið skrælt! Pabbi fékk sér reyktan silung og var sáttur. Gyða var ánægð með kjötsúpuna. Jóna Dóra og Kolla fengu sér Crepes og voru ánægðar. Inga María og Ásdís birta kvörtuðu ekki undan grilluðu samlokunum.

Þannig að maturinn var misspennandi en verðlagið er að mínu mati út úr öllu korti. Rétturinn minn kostaði 2500.-. Þetta borgaði ég fyrir sex sneiðar af mosarella osti (kannski ein kúla, kostar 250 úti í búð), einn tómat, smá kál, fetaost og rúgbrauðssneið. Fyrir svona pening hefði smjörið átt að koma fallega skreytt á borðið en ekki í umbúðum frá MS.

Ofan á þetta bætist svo að þrátt fyrir að við værum að versla fyrir um tuttugu þúsund krónur í hádeginu var ekki hægt að fá að smakka flís af hráa tvíreykta hangikjötinu. Kokkurinn sendi skilaboð um að við þyrftum að kaupa disk (á 2900.-) til að fá að smakka. Við vorum ekki að biðja um smakk fyrir alla á borðinu, pabbi bað um "flís". Þetta er tómt rugl.

Ég var semsagt óskaplega spenntur fyrir veitingastaðnum í Vogafjósi en varð fyrir miklum vonbrigðum. Fer ekki aftur.