Sumir furða sig á að séra Gunnar Björnsson ætlar að mæta til vinnu eins og ekkert hafi í skorist þrátt fyrir að teljast sekur um siðferðisbrot. Lögfræðingur séra Gunnars skyldi ekkert af hverju fólk væri ekki tilbúið að fyrirgefa klerkinum eins og hægt sé að ætlast til að kristið fólk hafi eitthvað ákveðið siðferðislegt viðmið til að fara eftir í slíkum málum.

Málið er að það hefur engar afleiðingar þó prestur sé úrskurðaður að hafa ekki breytt siðferðilega rétt. Nýlegt dæmi er þegar séra Svavar Alfreð á Akureyri fékk slíkan úrskurð (mbl) eftir að hafa skírt barn í óþökk föður. Afleiðingarnar voru engar, séra Svavar hefur ekki einu sinni haft fyrir því að biðja viðeigandi afsökunar.

Þannig að þið skuluð ekki láta ykkur bregða þó séra Gunnar á Selfossi sjái ekki ástæðu til að taka mark á siðferðislegum dómi. Það er misskilningur að prestar séu eitthvað merkilegri en við hin og tími til kominn að hætta að líta upp til þeirra í siðferðislegum málum eins og svo margir gera. Þetta eru bara upphafnir embættismenn.