Í ákveðnum kreðsum er nokkuð algengt að menn kalli hvorn annan kjellin.

Hvað segir Kjellin?

Ég hef lengi velt því fyrir mér hvaðan þetta kæmi, hélt þetta væri tengt Selfossi, strípum og bíldruslum með vindskeið en rambaði um daginn á svarið fyrir algjöra tilviljun. Ég var að skipta milli sjónvarpsstöðva og sá að stórþættirnir Dynasty voru að hefjast á Skjáeinum. Vissi ekki að þeir væru í sjónvarpinu þannig að ég ákvað að horfa á fyrstu mínúturnar. Meðan upphafsstefið spilaði og áhorfendur fengu að virða fyrir sér glæsihallirnar sem persónur þáttanna eiga að búa í blasti svarið við á skjánum. Sænski leikarinn og leikstjórinn Alf Kjellin var augljóslega mikill örlagavaldur í íslenskri hnakkamenningu. Hnakkarnir eru því alls ekki jafn grunnir og sumir héldu heldur hafa þeir djúpan og þroskaðan smekk á klassísku sjónvarpsefni og nota vísanir í það í daglegu tali sjálfum sér og öðrum til upplyftingar.

Svo ég vitni í skáldið (Dr. Gunna):

Verum góð við hnakkana.
Þetta er ekki þeim að kenna.
Þeir meina vel en þeir eru bara svona
og lítið hægt að gera við því.

ps. Ég gafst upp á Dynasty-glápi eftir þrjár mínútur. Annars er kjellin bara ljúfur.