Fórum á Holtið í hádeginu með tengdaforeldrum mínum. Þar er nokkuð hagstæður tilboðsseðill í hádeginu, hægt að borða þríréttað fyrir þrjúþúsund og tvöhundruð krónur.

Því miður get ég ekki sagt að almenn ánægja hafi verið með matinn. Í forrétt fengum ég og Kolla Humar og rækjubiska sem var ágætt. Inga María fékk sér kúrbítssúpu og hinir fengu sér dádýraterrín og voru ekkert sérlega hrifin, eins og það leit nú vel út.

Gyða og foreldrar hennar fengu sér plokkfisk í aðalrétt og urðu fyrir miklum vonbrigðum. Ég smakkaði hjá Gyðu og tek undir með þeim - þessi réttur var alls ekki staðnum sæmandi. Þurr og þéttur, eiginlega líkari fiskibollum en plokkfisk.

Ég fékk mér aftur á móti Rib-eye steik með bearnaisesósu og var afar sáttur. Stelpurnar fengu sér grillaða kjúklingabringu og sá réttur var líka vel heppnaður.

Heita súkkulaðikakan var fín, mín var þó full mikið bökuð en aðrir fengu fljótandi miðju.

Þjónusta var ágæt en á Holtinu á maður samt ekki að vera lengi með tómt vatnsglas fyrir framan sig.

Þannig að Holtið klikkaði, hagstætt verð en ekkert sérlega góður matur. Það er samt gaman að virða málverkin fyrir sér.