Skólatrúboð - "ekki mitt vandamál"
Stundum þegar við í Vantrú bendum á trúboð ríkiskirkjunnar í leik- og grunnskólum fáum við svar sem hljómar eitthvað svona:
Ég kannast ekki við að það sé trúboð í skóla minna barna.
Hér er eitt dæmi en ég hef séð álíka athugasemdir ansi oft. Það er freistandi að yfirfæra þessi rök á eitthvað annað en ég sleppi því í bili.
Mér finnst þetta alltaf jafn einkennilegt. Vissulega eiga sumir erfitt með að trúa því að þetta sé raunverulega í gangi. Fólk biður um dæmi og við bendum á þau. Þá spyrja margir hversu algengt þetta sé eins og það sé í lagi að trúboð sé stundað í tveimur eða þrem leikskólum eða bara nokkrum grunnskólum svo lengi sem þetta sé ekki algengt.
Það er einfaldlega alls ekki í lagi að trúboð fari fram í einum einasta leik- eða grunnskóla landsins. Þetta er einfaldlega grundvallaratriði.
Margir vilja ekki trúa því en ríkiskirkjan stefnir á aukið kristniboð í leik- og grunnskólum landsins. Markmið kirkjunnar er að komast inn í alla skóla. Vissulega eru notaðir frasar eins og þetta sé á forsendum skólanna, en það er einfaldlega lygi. Ef það væri ekki fyrir mótmælir "hatrammra" trúleysingja væri Vinaleið í miklu fleiri grunnskólum landsins í dag og leikskólatrúboð mun algengara en það þó er.
Kristín Kristjánsdóttir - 02/11/09 12:23 #
Þetta er dapurlegra en orð fá lýst.
Ég skrapp heim úr skólanum núna (á framhaldsskólastigi reyndar) því það er í gangi peppfundur fyrir nemendur og hver heldurðu að hafi verið fenginn til verksins?
Ég spurði eftir því hvort hlutlausari aðilar hefðu ekki verið aðgengilegir til verksins en var þá bent á það að presturinn kæmi nú frá ÞJÓÐkirkjunni.
Asninn ég, er alltaf að brenna mig á því að halda að ég tilheyri þjóðinni. Ég er náttúrulega það dökk yfirlitum að ég er sjálfsagt af einhverri allt annarri villimannaþjóð.